usi ke honTon ke phul bab-e-qubul chumen
so hum uTha laen ab ke harf-e-dua usi ka

Kabir Ajmal

---

---

wo mere KHwab chura kar bhi KHush nahin 'ajmal'
wo ek KHwab lahu mein jo phail jaana tha

Kabir Ajmal

---

---

ye gham mera hai to phir ghair se ilaqa kya
mujhe hi apni tamanna ka bar Dhone de

Kabir Ajmal

---

---

yun KHush na ho ai shahr-e-nigaran ke dar o baam
ye wadi-e-saffak bhi rahne ki nahin hai

Kabir Ajmal

---

---

zamir o zehn mein ek sard jang jari hai
kise shikast dun aur kis pe fath paun main

Kabir Ajmal

---

---

zinda koi kahan tha ki sadqa utarta
aaKHir tamam shahr hi KHashak ho gaya

Kabir Ajmal

---

---

ek ek baat mein sachchai hai us ki lekin
apne wadon se mukar jaane ko ji chahta hai

Kafeel Aazar Amrohvi

---

---