hum se koi talluq-e-KHatir to hai use
wo yar ba-wafa na sahi bewafa to hai

Jameel Malik

---

---

hum to tamam umr teri hi ada rahe
ye kya hua ki phir bhi hamin bewafa rahe

Jameel Malik

---

---

jaan nazr ki to donon jahan mil gae hamein
tai marg o zindagi ka har ek marhala hua

Jameel Malik

---

---

kaise the log jin ki zabanon mein nur tha
ab to tamam jhuT hai sachchaiyon mein bhi

Jameel Malik

---

---

KHatm ho jaen jinhen dekh ke bimari-e-dil
DhunD kar laen kahan se wo masiha chehre

Jameel Malik

---

---

kitne hathon ne tarashe ye hasin taj-mahal
jhankte hain dar-o-diwar se kya kya chehre

Jameel Malik

---

---

main to tanha tha magar tujh ko bhi tanha dekha
apni taswir ke pichhe tera chehra dekha

Jameel Malik

---

---