arahman shaiKH ko kar de nigah-e-naz us but ki
gulu-e-zohd mein tar-e-nazar zunnar ban jae

Habeeb Musvi

---

---

utan-e-sarw-qamat ki mohabbat mein na phal paya
riyazat jin pe ki barson wo naKHl-e-be-samar nikle

Habeeb Musvi

---

---

chandni chhupti hai takyon ke tale aankhon mein KHwab
sone mein un ka dupaTTa jo sarak jata hai

Habeeb Musvi

---

---

dasht-o-sahra mein hasin phirte hain ghabrae hue
aaj-kal KHana-e-ummid hai viran kis ka

Habeeb Musvi

---

---

dil liya hai to KHuda ke liye kah do sahab
muskuraate ho tumhin par mera shak jata hai

Habeeb Musvi

---

---

dil mein bhari hai KHak mein milne ki aarzu
KHakistari hua hai hamari qaba ka rang

Habeeb Musvi

---

---

fasl-e-gul aai uTha abr chali sard hua
su-e-mai-KHana akaDte hue mai-KHwar chale

Habeeb Musvi

---

---