hosh wale to ulajhte hi rahe
raste tai hue diwanon se

Shaukat Pardesi

---

---

hawaen rok na pain bhanwar Dubo na sake
wo ek naw jo azm-e-safar ke baad chali

Shaukat Pardesi

---

---

hae us minnat-kash-e-wahm-o-guman ki justuju
zindagi jis ko na pae jo na pae zindagi

Shaukat Pardesi

---

---

hanste hanste bahe hain aansu bhi
rote rote hansti bhi aai hamein

Shaukat Pardesi

---

---

deta raha fareb-e-musalsal koi magar
imkan-e-iltifat se hum khelte rahe

Shaukat Pardesi

---

---

arq ki shoala-mizaji hai musallam lekin
main ne dekha mere sae se ye katraati hai

Shaukat Pardesi

---

---

apne parae thak gae kah kar har koshish bekar rahi
waqt ki baat samajh mein aai waqt hi ke samjhane se

Shaukat Pardesi

---

---

ai inqalab-e-nau teri raftar dekh kar
KHud hum bhi sochte hain ki ab tak kahan rahe

Shaukat Pardesi

---

---

ahd-e-aghaz-e-tamanna bhi mujhe yaad nahin
mahw-e-hairat hun ki itna bhi mujhe yaad nahin

Shaukat Pardesi

---

---