faisle auron ke karta hun
apni saza kaTti rahti hai
Shariq Kaifi
guftugu kar ke pareshan hun ki lahje mein tere
wo khula-pan hai ki diwar hua jata hai
Shariq Kaifi
hain ab is fikr mein Dube hue hum
use kaise lage rote hue hum
Shariq Kaifi
ho sabab kuchh bhi mere aankh bachane ka magar
saf kar dun ki nazar kam nahin aata hai mujhe
Shariq Kaifi
jaise ye mez miTTi ka hathi ye phul
ek kone mein hum bhi hain rakkhe hue
Shariq Kaifi
jhuT par us ke bharosa kar liya
dhup itni thi ki saya kar liya
Shariq Kaifi
jin par main thoDa sa bhi aasan hua hun
wahi bata sakte hain kitna mushkil tha main
Shariq Kaifi
kabhi KHud ko chhu kar nahin dekhta hun
KHuda jaane kis wahm mein mubtala hun
Shariq Kaifi
kahan socha tha main ne bazm-arai se pahle
ye meri aaKHiri mahfil hai tanhai se pahle
Shariq Kaifi