teri baaton ko chhupana nahin aata mujh se
tu ne KHushbu mere lahje mein basa rakkhi hai

Iqbal Ashhar

---

---

sataya aaj munasib jagah pe barish ne
isi bahane Thahar jaen us ka ghar hai yahan

Iqbal Ashhar

---

---

sochta hun teri taswir dikha dun us ko
raushni ne kabhi saya nahin dekha apna

Iqbal Ashhar

---

---

suno samundar ki shoKH lahro hawaen Thahri hain tum bhi Thahro
wo dur sahil pe ek bachcha abhi gharaunde bana raha hai

Iqbal Ashhar

---

---

tere kirdar ko itna to sharaf hasil hai
tu nahin tha to kahani mein haqiqat kam thi

Iqbal Ashhar

---

---

wahi to markazi kirdar hai kahani ka
usi pe KHatm hai tasir bewafai ki

Iqbal Ashhar

---

---

wo kisi ko yaad kar ke muskuraya tha udhar
aur main nadan ye samjha ki wo mera hua

Iqbal Ashhar

---

---

waise bhi us se koi rabt na rakkha main ne
yun bhi duniya mein kashish teri ba-nisbat kam thi

Iqbal Ashhar

---

---

sabhi apne nazar aate hain ba-zahir lekin
ruThne wala hai koi na manane wala

Iqbal Ashhar

---

---