tu hai mani parda-e-alfaz se bahar to aa
aise pas-manzar mein kya rahna sar-e-manzar to aa

Faza Ibn e Faizi

---

---

log mujh ko mere aahang se pahchan gae
kaun badnam raha shahr-e-suKHan mein aisa

Faza Ibn e Faizi

---

---

mujhe tarash ke rakh lo ki aane wala waqt
KHazaf dikha ke guhar ki misal puchhega

Faza Ibn e Faizi

---

---

nutq se lab tak hai sadiyon ka safar
KHamushi ye dukh bhala jhelegi kya

Faza Ibn e Faizi

---

---

palkon par apni kaun mujhe ab sajaega
main hun wo rang jo tere paikar se kaT gaya

Faza Ibn e Faizi

---

---

shaKHsiyat ka ye tawazun tera hissa hai 'faza'
jitni sada hai tabiat utna hi tikha huna

Faza Ibn e Faizi

---

---

talash-e-mani-e-maqsud itni sahl na thi
main lafz lafz utarta gaya bahut gahra

Faza Ibn e Faizi

---

---

tujhe hawas ho jo mujh ko hadaf banane ki
mujhe bhi tir ki surat kaman mein rakh dena

Faza Ibn e Faizi

---

---

yun maani se bahut KHas hai rishta apna
zindagi kaT gai lafzon ko KHabar karne mein

Faza Ibn e Faizi

---

---