use bhi jate hue tum ne mujh se chhin liya
tumhaara gham to meri aarzu ka zewar tha

Azad Gulati

---

---

aushni phaili to sab ka rang kala ho gaya
kuchh diye aise jale har-su andhera ho gaya

Azad Gulati

---

---

sal-e-nau aata hai to mahfuz kar leta hun main
kuchh purane se calender zehn ki diwar pa

Azad Gulati

---

---

sameT lata hun moti tumhaari yaadon ke
jo KHalwaton ke samundar mein Dubta hun main

Azad Gulati

---

---

sameT lo mujhe apni sada ke halqon mein
main KHamushi ki hawa se bikharne wala hun

Azad Gulati

---

---

shayad tum bhi ab na mujhe pahchan sako
ab main KHud ko apne jaisa lagta hun

Azad Gulati

---

---

tumhein bhi mujh mein na shayad wo pahli baat mile
KHud apne waste ab koi dusra hun main

Azad Gulati

---

---

yaadon ki mahfil mein kho kar
dil apna tanha tanha hai

Azad Gulati

---

---

zindagi ai zindagi!! aa do ghaDi mil kar rahen
tujh se mera umr-bhar ka to koi jhagDa na tha

Azad Gulati

---

---