muddaton ghaw kiye jis ke badan par hum ne
waqt aaya to usi KHwab ko talwar kiya

Arshad Abdul Hamid

---

---

miTTi ko chum lene ki hasrat hi rah gai
TuTa jo shaKH se to hawa le gai mujhe

Arshad Abdul Hamid

---

---

dil ko malum hai kya baat batani hai use
us se kya baat chhupani hai zaban jaanti hai

Arshad Abdul Hamid

---

---

mile jo us se to yaadon ke par nikal aae
is ek maqam pe kitne safar nikal aae

Arshad Abdul Hamid

---

---

main apne aap ko bhi dekhne se qasir hun
ye sham-e-hijr mujhe kya dikhana chahti hai

Arshad Abdul Hamid

---

---

kuchh sitare meri palkon pe chamakte hain abhi
kuchh sitare mere sine mein samae hue hain

Arshad Abdul Hamid

---

---

kis kis ko samjhaega ye nadani chhoD
chehre ko sundar bana aaina mat toD

Arshad Abdul Hamid

---

---

KHuda kare ye raushni paDe kabhi na mand
galon par wo likh gaya aadhe aadhe chand

Arshad Abdul Hamid

---

---

ishq marhun-e-hikayat-o-guman bhi hoga
waqia hai to kisi taur bayan bhi hoga

Arshad Abdul Hamid

---

---