phir koi dur hua jata hai
phir koi dil ke qarib aaega

Ahmad Ata

---

---

na-rasai ne ajab taur sikhae hain 'ata'
yani bhule bhi nahin tum ko pukara bhi nahin

Ahmad Ata

---

---

main us ki aaankhon ke bare mein kuchh nahin kahta
ufuq se ta-ba-ufuq ek jahan samajh lije

Ahmad Ata

---

---

main to miTTi ho raha tha ishq mein lekin 'ata'
aa gai mujh mein kahin se be-dimaghi 'mir' ki

Ahmad Ata

---

---

main teri ruh mein utra hua milunga tujhe
aur is tarah ki tujhe kuchh KHabar nahin honi

Ahmad Ata

---

---

aaj dekha hai use aisi mohabbat se 'ata'
wo yahi bhul gaya us ko kahin jaana tha

Ahmad Ata

---

---

kya hue log purane jinhen dekha bhi nahin
ai zamane hamein taKHir hui aane mein

Ahmad Ata

---

---

koi guman hun koi yaqin hun ki main nahin hun
main DhunDhta hun ki main kahin hun ki main nahin hun

Ahmad Ata

---

---

koi aisa to tere baad nahin rahna tha
haalat-e-hijr ko uftad nahin rahna tha

Ahmad Ata

---

---