kaisa ghazab ye ai dil-e-pur-josh kar diya
teri rawish ne un ko jafa-kosh kar diya
us chashm-e-pur-KHumar ki sar-mastiyan na puchh
sab ko ba-qadr-e-hausla mai-nosh kar diya
majbur ho chuki thi zaban arz-e-haal par
lekin teri nigah ne KHamosh kar diya
un ki jafaon par bhi wafa ka hua guman
apni wafaon ko bhi faramosh kar diya
qurban us nigah ke jis ne 'hamid' ko
sad-mahshar-e-KHayal dar-aghosh kar diya
Ghazal
Kaisa ghazab ye ai dil-e-pur-josh kar diya
Hameed Jalandhari