jab zindagi sukun se mahrum ho gai
un ki nigah aur bhi masum ho gai
haalat ne kisi se juda kar diya mujhe
ab zindagi se zindagi mahrum ho gai
qalb o zamir be-his o be-jaan ho gae
duniya KHulus o dard se mahrum ho gai
un ki nazar ke koi ishaare na pa saka
mere junun ki chaaron taraf dhum ho gai
kuchh is tarah se waqt ne lin karwaTen 'asad'
hansti hui nigah bhi maghmum ho gai
Ghazal
Jab zindagi sukun se mahrum ho gai
Asad Bhopali