aah jo dil se nikali jaegi
kya samajhte ho ki KHali jaegi
is nazakat par ye shamshir-e-jafa
aap se kyunkar sambhaali jaegi
kya gham-e-duniya ka Dar mujh rind ko
aur ek botal chaDha li jaegi
shaiKH ki dawat mein mai ka kaam kya
ehtiyatan kuchh manga li jaegi
yaad-e-abru mein hai 'akbar' mahw yun
kab teri ye kaj-KHayali jaegi
Ghazal
Aah jo dil se nikali jaegi
Akbar Allahabadi