ek sae ki talab mein zindagi pahunchi yahan
dur tak phaila hua hai mujh mein manzar dhup ka

Tufail Chaturvedi

---

---

hum buzurgon ki riwayat se juDe hain bhai
nekiyan kar ke kabhi phal nahin manga karte

Tufail Chaturvedi

---

---

har taraf phaila hua be-samt be-manzil safar
bhiD mein rahna magar KHud ko akela dekhna

Tufail Chaturvedi

---

---

kabhi zamana tha us ki talab mein rahte the
aur ab ye haal hai KHud ko usi se mangte hain

Tufail Chaturvedi

---

---

nafraton ka aks bhi paDne na dena zehan par
ye andhera jaane kitnon ka ujala kha gaya

Tufail Chaturvedi

---

---

sabhi zaKHmon ke Tanke khul gae hain
hamein hansna bahut mahnga paDa hai

Tufail Chaturvedi

---

---

safar anjam tak pahunche to kaise
main apne raste mein KHud khaDa hun

Tufail Chaturvedi

---

---

us ke wade ke ewaz de Dali apni zindagi
ek sasti shai ka unche bhaw sauda kar liya

Tufail Chaturvedi

---

---

wo mausamon par uchhaalta hai sawal kitne
kabhi to yun ho ki aasman se jawab barse

Tufail Chaturvedi

---

---