gham na apna na ab KHushi apni
yani duniya badal gai apni

Mumtaz Ahmad Khan Khushtar

---

---

gham-o-karb-o-alam se dur apni zindagi kyun ho
yahi jine ka saman hain to phir in mein kami kyun ho

Mumtaz Ahmad Khan Khushtar

---

---

ghubar-e-zindagi mein laila-e-maqsud kya mani
wo diwane hain jo is gard ko mahmil samajhte hain

Mumtaz Ahmad Khan Khushtar

---

---

jab se fareb-e-zist mein aane laga hun main
KHud apni mushkilon ko baDhane laga hun main

Mumtaz Ahmad Khan Khushtar

---

---

jis ne ji bhar ke tajalli ko kabhi dekha ho
koi aisa bhi teri jalwa-gah-e-naz mein hai

Mumtaz Ahmad Khan Khushtar

---

---

kahan rah jae thak kar rah-naward-e-gham KHuda jaane
hazaron manzilen hain manzil-e-aram aane tak

Mumtaz Ahmad Khan Khushtar

---

---

talash-e-surat-e-taskin na kar auham-hasati mein
dil-e-mahzun bahal sakta nahin is naqsh-e-baatil se

Mumtaz Ahmad Khan Khushtar

---

---

usi ko hum samajh lete hain apna sadgi dekho
jo apne sath rah-e-shauq mein do gam aata hai

Mumtaz Ahmad Khan Khushtar

---

---