aaghaz-e-mohabbat mein 'ajiz' rukti na thi mauj-e-ashk-e-rawan
anjam ab in KHushk aankhon se ek ashk nikalna mushkil hai

Ajiz Matvi

---

---

ek hum hain hum ne kashti Dal di gardab mein
ek tum ho Darte ho aate hue sahil ke pas

Ajiz Matvi

---

---

hasraten aa aa ke jama ho rahi hain dil ke pas
karwan goya pahunchne wala hai manzil ke pas

Ajiz Matvi

---

---

ho bijliyon ka mujh se jahan par muqabla
ya-rab wahin chaman mein mujhe aashiyana de

Ajiz Matvi

---

---

hota hai mahsus ye 'ajiz' shayad us ne dastak di
tez hawa ke jhonke jab darwaze se Takraate hain

Ajiz Matvi

---

---

insan hadsat se kitna qarib hai
tu bhi zara nikal ke kabhi apne ghar se dekh

Ajiz Matvi

---

---

mahw-e-hairat hun KHarash-e-dast-e-gham ko dekh kar
zaKHm chehre par hain ya hai aaina TuTa hua

Ajiz Matvi

---

---

main jin ko apna kahta hun kab wo mere kaam aate hain
ye sara sansar hai sapna sab jhuTe rishte-nate hain

Ajiz Matvi

---

---

muntazir hun main kafan bandh ke sar se 'ajiz'
samne se koi KHanjar nahin aaya ab tak

Ajiz Matvi

---

---