Zindan ki ek subh

raat baqi thi abhi jab sar-e-baalin aa kar
chand ne mujh se kaha 'jag sahar aai hai

jag is shab jo mai-e-KHwab tera hissa thi
jam ke lab se tah-e-jam utar aai hai'

aks-e-jaanan ko wida kar ke uThi meri nazar
shab ke Thahre hue pani ki siyah chadar par

ja-ba-ja raqs mein aane lage chandi ke bhanwar
chand ke hath se taron ke kanwal gir gir kar

Dubte tairte murjhate rahe khilte rahe
raat aur subh bahut der gale milte rahe

sehn-e-zindan mein rafiqon ke sunahre chehre
sath-e-zulmat se damakte hue ubhre kam kam

nind ki os ne un chehron se dho Dala tha
des ka dard firaq-e-ruKH-e-mahbub ka gham

dur naubat hui phirne lage be-zar qadam
zard faqon ke satae hue pahre wale

ahl-e-zindan ke ghazabnak KHaroshan nale
jin ki bahon mein phira karte hain bahen Dale

lazzat-e-KHwab se maKHmur hawaen jagin
jel ki zahr-bhari chur sadaen jagin

dur darwaza khula koi koi band hua
dur machli koi zanjir machal ke roi

dur utra kisi tale ke jigar mein KHanjar
sar paTakne laga rah rah ke daricha koi

goya phir KHwab se bedar hue dushman-e-jaan
sang-o-faulad se Dhaale hue jinat-e-giran

jin ke changul mein shab o roz hain fariyaad-kunan
mere bekar shab o roz ki nazuk pariyan

apne shahpur ki rah dekh rahi hain ye asir
jis ke tarkash mein hain ummid ke jalte hue tir