Zamin ka qarz

zamin ka qarz hai hum sab ke dosh-o-gardan par
ajib qarz hai ye qarz-e-be-talab ki tarah

hamin hain sabza-e-KHud-rau hamin hain naqsh-e-qadam
ki zindagi hai yahan maut ke sabab ki tarah

har ek chiz numayan har ek shai pinhan
ki nim roz ka manzar hai nim shab ki tarah

tamasha-gah-e-jahan ibrat-e-nazara hai
ziyan-ba-dast rifaqat ke karobar mere

utarti jati hai baam-o-dar-e-hayat se dhup
bichhaDte jate hain ek ek kar ke yar mere

main dafn hota chala hun har ek dost ke sath
ki shahr shahr hain bikhre hue mazar mere