Yaum-e-azadi

zamin-e-hind hai aur aasman-e-azadi
yaqin ban gaya ab to guman-e-azadi

suno buland hui phir azan-e-azadi
sar-e-niyaz hai aur aastan-e-azadi

pahaD kaT gaya nur-e-sahar se raat mili
KHuda ka shukr ghulami se to najat mili

hawa-e-aish-o-tarab baadban ban ke chali
zamin watan ki naya aasman ban ke chali

nasim-e-subh phir arjun ka ban ban ke chali
bahaar-e-hind tiranga nishan ban ke chali

sipahi desh ka apne har ek jawan bana
bal abruon ka kaDakti hui kaman bana

nazar-nawaz hai rang-e-bahaar-e-azadi
har ek zarra hai aaina-e-dar-e-azadi

hai sar-zamin-e-watan jalwa-zar-e-azadi
saron ke sath hai ab to waqar-e-azadi

kahan hain aaj wo sham-e-watan ke parwane
bane hain aaj haqiqat unhin ke afsane

hijab uTh gae ab kis ki parda-dari hai
ghazab ki dida-e-nargis mein hoshiyari hai

kali ne mang baDe husn se sanwari hai
hasin phulon mein rang-e-KHud-iKHtiyari hai

khaTak kahan se ho ab dil mein koi phans bhi hai
KHuda ka shukr ki marzi ki ab to sans bhi hai

zamin apni faza apni aasman apna
hukumat apni alam apna aur nishan apna

hain phul apne chaman apne baghban apna
itaat apni sar apna hai aastan apna

jamal-e-kaba nahin ya jamal-e-dair nahin
sab apne hi nazar aate hain koi ghair nahin