Tisri aankh

to phir yun hua
hum shikasta-dilon ne sipar Dal di

jitne nawak-ba-dast apne ahbab
koh-e-wafa par khaDe the

hamein un sabhi ki jigar-dariyon
be-gharaz juraton par mukammal yaqin tha

magar jaan-nisari ke is marke mein
saf-e-ham-rahan ko palaT kar jo dekha

to koi nahin tha
sabhi nargha-e-dushmanan mein khaDe the

hujum-e-kashida-saran
pa-ba-zanjir zer-e-nagin tha

so phir yun hua
maqtalon ki taraf jab rawana hue hum

to sari jabinon pe nangi KHajalat
barahna nadamat ke qatre juDe the

hum andhe sarabon ke la-muntaha silsilon mein khaDe the
hazar saaton

thartharaate labon par
faqat KHamushi thi

sitam taziyanon ke qatil pharere
fasil-e-zaban-o-dahan par gaDe the

wo mausam kaDe the
to phir yun hua

hum darida-badan
dashna-e-qatilan ka hadaf ban gae

qatra qatra hamara chamakta gae
shahr-e-mehrban ke dar-o-baam par

jagmagane lage
tisri aankh ka nama-bar hum ko muzhda sunane laga