Tere siwa

sochta hun ki tere pyar ke badle mujh ko
kya mila dard-o-gham-o-ranj-o-musibat ke siwa

ek taDap ek kasak ek KHalish hai paiham
ek lamha bhi sukun ka na mere pas raha

aur tu ajnabi aaghosh ki zinat ban kar
ek chamakti hui firdaus mein ja baiThi hai

raqs karte hain nae KHwab nigahon mein teri
dil se mazi ke sabhi naqsh miTa baiThi hai

meri mahbub mere dil ke siyah-KHane mein
jhilmilati hain teri yaad ki shamen ab bhi

aahaTen teri tasawwur mein basi hain ab tak
tere jalwon se saji hain meri nazren ab bhi

meri taKHil ke KHwabida darichon se abhi
teri pael ke chhanakne ki sada aati hai

mere ehsas pe lahraati hain zulfen teri
jab kabhi jhum ke sawan ki ghaTa aati hai

main ne har chand tujhe bhulna chaha lekin
phir bhi aankhon mein tere KHwab machal jate hain

ab talak bhi meri fikron ke tarashida KHutut
jaane kyun tere KHad-o-KHal mein Dhal jate hain

ab ye socha hai ki phir dil mein samo lunga tujhe
jazb kar lunga nigahon mein tere naqsh-e-hasin

kyunki shayad meri taKHliq mere fan ka suhag
tujh se hai teri qasam tere siwa kuchh bhi nahin