Talluq ki na-jaez tajawuzat

bahut ghaur-o-KHauz ke baad bil-aKHir
talash KHatm kar di gai

is makan ki chobi siDhiyon ke
nisf daere par

jo hamari samt ka aaKHiri hissa bataya gaya hai
aur qali kar di gai

un tamam diwar-gir andazon par
jo hamein toD-maroD kar likhte the

alag kiye hue panw
jo kisi ajnabi raste ka hissa nahin bane

chamDe ke juton mein saint kar rakh liye gae
wo aankhen darwazon se utar kar

maKHmalin keson mein
hifazat se rakh di gai hain

jo kisi nae manzar ke frame mein puri nahin aa sakin
in par phunka gaya sehr

be-abaad gharon ko
bataur-e-zakat de diya gaya

ab un gharon se raaton ko hansne ki
jinnati aawazen aati hain

wo hath bandhe rah gae
namaz ki ibtidai rakaton mein

aur nafli ibaadaten musallon ke dilkash designon par
ungliyan pherti rah gain

aur hum jhaD-phunk kar ek KHandani talluq
apne badan ke thailon mein

sambhaal ke rakh chuke
is liye

tum hamein apni yaad-dasht ki siDhiyon se
dhakka de kar

KHud ko nae sire se rasman tamir karo