SiDhiyon se upar ek makan

un siDhiyon par
aur un se upar ek tang makan ke farsh par

ikkiswin sadi ka koi musawwir
wo honT daryaft nahin kar saka

jo tumhaare pairon ko chum nahin sake
aur makan ki wo diwaren

jin se tumhaari kamar ragaD nahin kha saki
aur koi nazm

tumhaari KHwahish karne wale wo lafz nahin DhunD saki
jo in siDhiyon se upar

ek tang makan ki diwaron ke darmiyan
ek shaKHs se faramosh ho gae

ya jinhen us ne
kaghaz par darashti se kaT diya

ya likhe baghair tark kar diya
ya apni aankhon ko saunp diya

ki ek rose tum unhen aasani se paDh sako
aur ziyaada aasani ke sath

un ka inkar kar sako