mast ghaTa manDlai hui hai
bagh pe masti chhai hui hai
jhum rahi hain aam ki shaKHen
nind si jaise aai hui hai
bolta hai rah rah ke papiha
barq si ek lahrai hui hai
lahke hue hain phul shafaq ke
aatish-e-tar chhalkai hui hai
sher mere ban ban ke huwaida
qaus ki har angDai hui hai
rengte hain KHamosh tarane
mauj-e-hawa bal khai hui hai
raunaq-e-alam sar hai jhukae
jaise dulhan sharmai hui hai
ghas pe gum-sum baiTha hai 'kaifi'
yaad kisi ki aai hui hai
Nazm
Sham
Kaifi Azmi