Shairi maine ijad ki

kaghaz marakashiyon ne ijad kiya
huruf fonishiyon ne

shairi main ne ijad ki
qabr khodne wale ne tandur ijad kiya

tandur par qabza karne walon ne roTi ki parchi banai
roTi lene walon ne qatar ijad ki

aur mil kar gana sikha
roTi ki qatar mein jab chyunTiyan bhi aa kar khaDi ho gain

to faqa ijad ho gaya
shahtut bechne wale ne resham ka kiDa ijad kiya

shairi ne resham se laDkiyon ke liye libas banaya
resham mein malbus laDkiyon ke liye kuTniyon ne mahal-sara ijad ki

jahan ja kar unhon ne resham ke kiDe ka pata bata diya
fasle ne ghoDe ke chaar panw ijad kiye

tez-raftari ne rath banaya
aur jab shikast ijad hui

to mujhe tez-raftar rath ke aage liTa diya gaya
magar us waqt tak shairi mohabbat ko ijad kar chuki thi

mohabbat ne dil ijad kiya
dil ne KHema aur kashtiyan banain

aur dur-daraaz ke maqamat tai kiye
KHwaja-sara ne machhli pakaDne ka kanTa ijad kiya

aur soe hue dil mein chubho kar bhag gaya
dil mein chubhe hue kanTe ki Dor thamne ke liye

nilami ijad hui
aur

jabr ne aaKHiri boli ijad ki
main ne sari shairi bech kar aag KHaridi

aur jabr ka hath jala diya