Safar ho rail-gaDi ka to chhake chhuT jate hain

safar ho rail-gaDi ka to chhake chhuT jate hain
pasine ke ghaDe goya saron par phuT jate hain

ticket lena jo pahla kaam hai aur saKHt mushkil hai
samajh lije ki ye apne safar ki pahli manzil hai

reserwation karana hai to pahle ek quli pakDen
KHushamad se mana lije quli sahib agar akDen

booking-office ka babu aap ki aasan kar dega
wo mushkil hal karega aur apni fees le lega

reserwation kara dega aur wo das-bis le ga
kisi ki seat ho wo aap ko dilwa ke dam lega

magar pahle ye tai kar len ki wo kitni raqam lega
hamesha yaad rakkhen ye usul-e-jawedani hai

ki station maqam-e-kuch hai aur dar-e-fani hai