Sadiyon se ajnabi

us ki qurbat mein bite sab lamhe
meri yaadon ka ek sarmaya

KHushbuon se bhara badan us ka
qabil-e-did bankpan us ka

shoala-afroz husn tha us ka
dilkashi ka wo ek namuna thi

mujh se jab ham-kalam hoti thi
KHwahishon ke chaman mein har jaanib

chahaton ke gulab khilte the
us ki qurbat mein aise lagta tha

ek pari aasman se utri ho
jab kabhi main ye puchhta us se

sath mere chalogi tum kab tak
mujh se qasmen uTha ke kahti thi

tu agar mujh se dur ho jae
ek pal bhi na ji sakungi main

aaj wo jab juda hui mujh se
us ne to alwidaa bhi na kaha

jaise sadiyon se ajnabi the hum