Phagun

aangan mein ek shajar hai
dalan mein hawaen

kamre mein ek laDki
ujli udas laDki

water-color se dil pe patte bana rahi hai
itne mein peD aaya

kamre mein peD aaya
patte gira ke bola bahar hawa bahut hai

laDki thi pahle ujli ab pili ho gai hai
phir chand pal bite daKHil hui hawaen

patte uDa ke bolin andar hawa bahut hai
laDki thi pahle pili ab lal ho gai hai

wo lal lal laDki ab be-qarar ho ke
water-color ka Dabba dil mein kahin chhupae

aanchal mein kuchh hawaen daman mein chand patte
dalan se guzar ke aangan ko par kar ke

maidan-e-nauha-KHwan mein aa ke ThiThak gai hai
maidan-e-nauha-KHwan mein ek canwas rakha hai

is canwas ke dil pe water-color mein bhiga
phagun ka har hara hai kab se wo jal raha hai!