Pagal

tu jo humak kar meri god mein chaDh jati hai
raaton ko be-mauqa nind uDa deti hai

teri KHatir
shora ke bazaron tak main ho aata hun

phir be-samjhi wah wah ke aawaze se ghayal ho kar
aksar muafi mang chuka hun

ai dad-o-tahsin ki KHwahish
hiron ka to kaam hai aankhen KHira karna

par un hiron ki taKHliq mein
aur pahchan ke darjon ki tarwij mein

lamba waqfa hai
kaun ye jaane

ye kitna lamba waqfa hai
ai dad-o-tahsin ki KHwahish

fard jamaat se gar dur nikal jata hai
to pagal hi kahlata hai