Nur-jahan ka mazar

din ko bhi yahan shab ki siyahi ka saman hai
kahte hain ye aaram-gah-e-nur-jahan hai

muddat hui wo shama tah-e-KHak nihan hai
uThta magar ab tak sar-e-marqad se dhuan hai

jalwaon se ayan jin ke hua tur ka aalam
turbat pe hai un ke shab-e-daijur ka aalam

ai husn-e-jahan-soz kahan hain wo sharare
kis bagh ke gul ho gae kis arsh ke tare

kya ban gae ab kirmak-e-shab-tab wo sare
har sham chamakte hain jo rawi ke kinare

ya ho gae wo dagh jahangir ke dil ke
qabil hi to the aashiq-e-dil-gir ke dil ke!

tujh si malika ke liye bara-dari hai
ghaalicha sar-e-farsh hai koi na dari hai

kya aalam-e-bechaargi ai taj-wari hai
din ko yahin bisram yahin shab-basri hai

aisi kisi jogan ki bhi kuTiya nahin hoti
hoti ho magar yun sar-e-sahra nahin hoti

tawiz-e-lahad hai zabar o zer ye andher
ye daur-e-zamana ke ulaT pher ye andher

aangan mein paDe gard ke hain Dher ye andher
ai gardish-e-ayyam ye andher! ye andher

mah-e-falak-e-husn ko ye burj mila hai
ai charKH tere husn-e-nawazish ka gila hai

hasrat hai Tapakti dar-o-diwar se kya kya
hota hai asar dil pe in aasar se kya kya

nale hain nikalte dil-afgar se kya kya
uThte hain sharar aah sharbar se kya

ye aalam-e-tanhai ye dariya ka kinara
hai tujh si hasina ke liye hu ka nazara

chau-pae jo ghabraate hain garmi se to aksar
aaram liya karte hain is rauze mein aa kar

aur sham ko baalai siyah KHanon se shappar
uD uD ke lagate hain dar-o-baam ke chakkar

mamur hai yun mahfil-e-jaanan na kisi ki
aabaad rahe gor-e-ghariban na kisi ki

aarasta jin ke liye gulzar o chaman the
jo nazuki mein dagh dah-e-barg-e-saman the

jo gul-ruKH o gul-pairahan o ghuncha-dahan the
shadab gul-e-tar se kahin jin ke badan the

pazhmurda wo gul dab ke hue KHak ke niche
KHwabida hain KHar-o-KHas-o-KHashak ke niche

rahne ke liye dida o dil jin ke makan the
jo paikar-e-hasti ke liye ruh-e-rawan the

mahbub-e-dil-KHulq the jaan-baKHsh-e-jahan the
the yusuf-e-sani ki masiha-e-zaman the

jo kuchh the kabhi the magar ab kuchh bhi nahin hain
TuTe hue pinjar se paDe zer-e-zamin hain

duniya ka ye anjam hai dekh ai dil-e-nadan
han bhul na jae tujhe ye madfan-e-viran

baqi hain na wo bagh na wo qasr na aiwan
aaram ke asbab na wo aish ke saman

TuTa hua ek sahil-e-rawi pe makan hai
din ko bhi jahan shab ki siyahi ka saman hai