mar jaenge zalim ki himayat na karenge
ahrar kabhi tark-e-riwayat na karenge
kya kuchh na mila hai jo kabhi tujh se milega
ab tere na milne ki shikayat na karenge
shab bit gai hai to guzar jaega din bhi
har lahza jo guzri wo hikayat na karenge
ye faqr dil-e-zar ka iwazana bahut hai
shahi nahin mangenge wilayat na karenge
hum shaiKH na leader na musahib na sahafi
jo KHud nahin karte wo hidayat na karenge
Nazm
Nazr-e-maulana hasrat-muhani
Faiz Ahmad Faiz