Nazm

Dher sari
ret ke niche dabi

ek ruh
der gae

ret haTane ki koshish mein
apne naKHun toD baiThi

yun to
kuchh toDna bhi achchha lagta hai

jo TuTne se bach sakta hai
qatl ho jata hai

waise
qatl hona hi jine ka sach hai

aur
is lamhe ka sach yahi hai

ki sadiyon baad aisa waqia hua tha
ki ret ke zarre

us ki aankhon mein chubh jaane se rah gae
dekha to

samne bhiD thi
shor-o-ghul tha

aur ek khokhli aawaz
jo

dur kahin ja ke
zindagi ka santur

chheD rahi thi
mujhe laga tha

us aawaz pe tumhaari aawaz ka saya tha