Nazm ki shaera

jis ke sheron ki laDiyan
mohabbat ke mathe ka singhaar thin

jis ke be-tab jazbon ki miThi kasak
lutf ki dastanon ka unwan thi

jo gulabi ruton ka mahakta hua surKH paiman thi
aaj KHamosh hai

nafraton ke alaw se uThta dhuan
zard shamon ke is matami ahd ko

de gaya hai sulagte lahu ki humak
phul ka ishq pesha gulabi badan

qabr ke zard katbe ka darban hai
titliyan mar chukin!

chand KHamosh hai
jugnuon ka qabila siyah-posh hai

nazm ki shaera!
marsiye mangti, be-gunahi ka taza lahu thukti

uDte barud ke zahr se khansti
hanpti-kanpti nazm kaise likhe