Mujhe wo nazm likhni hai

mujhe wo nazm likhni hai
ki har andaz-e-mausiqi se dohraya karun jis ko

magar ukta na jaun bar bar apne hi gane se
yun hi bas zindagi ke saz par gaya karun jis ko

magar ghabra na jaun zindagani ke fasane se
mujhe wo nazm likhni hai

ki jis mein zohra-o-nahid sab raqsan to hon lekin
kabhi mazdur ke andoh-gin ruKHsar bhi dekhun

hazaron raqs-ha-e-dil-nashin pinhan to hon lekin
kabhi talwar ki haibat-faza jhankar bhi dekhun

mujhe wo nazm likhni hai
ki jis ko maut ki aawaz se nafrat to ho lekin

payam-e-zindagi kuchh hausla-saman bhi hota ho
bahaar-e-zindagi ghairat-dah-e-jannat to ho lekin

gharib insan is jannat se kuchh shadan bhi hota ho
mujhe wo nazm likhni hai