KHuda kahta hai bandon se
mujhe tum se mohabbat hai
tumhaari shah-e-rag se bhi
main ziyaada pas rahta hun
tumhein main kaise samjhaun
mujhe tum se mohabbat hai
main dun tum ko misal aisi
jise tum sun ke barjasta
kaho aamanna saddaqna
suno
hai kaun si hasti
jo tum ko jaan se pyari hai
ki jis ki zist ka pal pal
tumhein pe wari wari hai
dua karte hue shab shab
sada jis ne guzari hai
ye sach hai wo to man hi hai
bas itna jaan lo logo
ki us man se kahin ziyaada
mujhe tum se mohabbat hai
Nazm
Mujhe tum se mohabbat hai
Ibn-e-Mufti