Muhasba

hawa kahin nam ko nahin thi
azan-e-maghrib se din ki paspa sipah ka dil dhaDak raha tha

tamam rangon ke imtiyazat miT chuke the
har ek shai ki siyah qaba thi

jagah jagah baam-o-dar ke paikar
ufuq ke rangin chaukhaTe mein

misal-e-taswir jam gae the
shajar hajar sab ke sab gireban mein sar jhukae

muhasba kar rahe the din bhar ke nek o bad ka
tawil qamat hazin khajuren

kaTi hui saaton ke matam mein
baal khole hue khaDi thin

nashemanon ko palaTte tair
kuchh aise tham tham ke uD rahe the

ki safha-e-asman pe goya
sarab-e-parwaz ban gae the

idhar mera dil
dhaDak dhaDak kar

ajib ibrat bhari nadamat se sochta tha
ki aaj ka din bhi kaT gaya hai