Meri maut ke masiha!

meri maut ke masiha!
tin barr-e-azmon pe tum ne mera pichha kiya hai

mausam badalte rahe taqdir ki tarah
main shahr shahr phira dhup ki tarah

main ne KHamoshiyan lafzon ke supurd kin
zaban ke lafz badle

magar tum ek tarik surang ki tarah saya saya
mere shuur mein utarte chale gae ho

mere zehn mere jism mere qalb ke makus ruKH!
meri tahriron ke aaseb!

tum meri tanhai ho mere wajud ki intiha aur shikast
chahe hue badan tumhaari aaghosh mein rakh ho gae hain

abadi KHamosh harif!
tum kaenat ke tamam nur ke sath shatranj khelte rahe ho

main nai tumhaari quwwaton ki hama-gir gunjalak bisat pe
KHana-ba-KHana

ishq aur lafzon ki saliben bichhain:
tum hawaon ki misal mere aas-pas baraste rahe

tum har sham phulon pe yalghaar karte paniyon pe chalte rahe ho
ye jaante hue bhi ki mere lafz

ret ke chehre pe khinche hue be-sabaat naqsh hain
main ne har ibtida har intiha ka isbaat kiya hai

faslon ki tarah tum sab kuchh nikalte chale gae ho
hamara jhagDa ta-umr jari rahega

mere sanson ke sathi aur dushman:
mere ham-shakl:

muqaddar ki band kitab:
main ne tumhaare raaz jaanne chahe

calendar ki tariKHon mein tumhein paDhna chaha
palkon ke darmiyan tumhaare libas ke na-malum tar bichhae

yaad rakho!
har raushni ne tumhein apne fani shoalon mein lapeTna chaha

magar waqt ki kalid!
tum ne kunjiyon ka guchcha na jaane kis miTTi mein dafn kar diya hai

tum jhuTe lafzon ki tarah
meri ungliyon mein se phisalte chale gae ho