Massage

ai ghazali aankhon wali
suna hai tumhaare shahr mein chae achchhi milti hai

so main chae pine aa jaun
tum bhi kisi cafe mein aa jaana

aur suno
farsuda samaj ke layani rasm-o-riwaj

ki baat mat karna
chali aana

us ne jawaban likha
chae chhoDiye aap hamare ghar tashrif laiye

hamari family se miliye
apni family se milwaiye

hum sada-mizaj sadiyon purani mehman-nawazi se
aap ka istiqbaal karenge

are laDki had karti ho
family se kaise tumhein milwa sakta hun

main apni sherni ko bhala kyunkar ganwa sakta hun
wo mujhe kachcha chaba jaegi

wo hairani se likhne lagi
sherni kaun sherni

jawab aaya sherni
meri sharik-e-hayat mere bachchon ki man

meri jaan
tum milne aao to Thik warna is topic ko KHatm karte hain

wo aansu pite baDe karb se likhne baiThi
aap mujhe bahut ghalat samjhe hain

main akele milne kabhi nahin aa sakti
aaKHir aap ne kya soch kar ye sab kaha hai

khilkhilate icon ke sath us ka massage numudar hua
are laDki tum mein zara hiss-e-mizah nahin hai

mazaq ko bhi tum koDh maghz nahin samajhti
ye sab az-rae tafannun kaha hai