Mahbuba ke liye aaKHiri nazm

pahle jitni baaten thin wo tum se thin
tere hi nam ki ek radif se sare qafiye

bante aur bigaDte the
main apne andhe hathon se

tere jism ke pur-asrar zamanon ki tahriren paDh leta tha
aur phir achchhi achchhi nazmen ghaD leta tha

tu bhi to kaghaz ke phulon ki manind
har mausam mein khil jati thi

or main hijr-o-visal ki KHushki aur tari par
tere liye har haal mein zinda rah leta tha

apne liye bhi teri taraf se
sari baaten kah leta tha

teri surat mere hone aur na hone
jagne sone ki is dhup aur chhanw mein

ek hi jaisi rahti thi
aur meri sanson ka baKHt tumhaare hi pallu se bandha tha

lekin ab to teri saDi ke sab lahariye
mere jism ko Das bhi chuke hain

ab to jao
meri purani nazmon ki almari mein aaram se ja kar so jao

kyunki main ab apne aap se baaten karna chahta hun