Lahu rota hai

sach ka hota hai muhafiz jo niDar hota hai
koi hakim ho KHuda ho ki KHuda ka banda

wo jo masum hai in sab se pare hota hai
man jo changa ho hatheli mein basi hai ganga

zulm se jabr se zulmat se muKHatib ho kar
aankh se aankh milata hai har ek sukh-dukh se

us ki KHamoshi hi elan hua karti hai
us ki aawaz mein chaalen hain na koi dhoke

ho bhale tanha use sena ki darkar nahin
bahu-bal chahiye us ko na koi bhi shamshir

wo qayamat hi qayamat mein jiya karta hai
aaKHiri us ki adalat hai faqat apna zamir

aaj malum hua KHwab ka KHaka tha ye
yun na tha main nen faqat socha tha yun hota hai

qatl ho jati hai insaf ki ummid agar
bhai-chaare ka irada bhi lahu rota hai