ai KHuda
lafz de mujhe kuchh to
dil ke sada waraq pe kuchh to utar
bhar mere kasa-e-KHayal ko to
is se pahle jo tu ne lafz diye
rehn rakkhe hain sare waqt ke pas
ab mere pas aur kuchh bhi nahin
ek zaban hai jo kitni sadiyon se
lafz ka lams pana chahti hai
mere honTon pe ism rakh apna
aur sochon ko de zamam-e-KHayal
main ki KHamosh hun zamanon se
mujh ko bhi harf aashna kar de
bhar mere kasa-e-KHayal ko to
ai KHuda
lafz de mujhe kuchh to
Nazm
Lafz de mujhe kuchh to
Tariq Shahid