Kosa dudh

to ye dudh kosa hai!
ye dudh hai aur kosa hai

jis se badan ki nasen ungh jati hain
jis se mere dil ki ba-qaeda dhaDkanon mein

izafe ki surat nahin
ye wahi dudh hai jis ko farhad ki garmi-e-shauq ne

biston ki siyah choTiyon se utara
tu is ke lahu ki hararat ka juya hua

phir bhi kosa raha
ye wahi dudh hai

chandni ban ke jo garmiyon ke kisi mah ki chaudhwin raat ko
aasman par zamin par dilon mein nigahon mein

bahta hai lekin
kisi ke labon ko jalata nahin hai

ye suraj ka saya hai lawa nahin hai!
tum apne piyale ko bhaTTi mein rakh do!

ki ye dudh ubalta rahe
ye pyala bhi Dhal jae

ye dudh jal jae
aur is tarah mushk-e-nafa bane

jis ki KHushbu ki taqat na lae koi shaKHs bhi
jis ki KHushbu se har maghz se KHun bahne lage!