Kaliyan nila aasman zanjir

aurat ke nam
mere ehsas ki wadi mein kaliyan muskuraati hain

magar main chun nahin sakti
main lamhon mein safar karti hun

tabinda ufuq ke is kinare tak
jahan aakash dharti ke labon ko chumta hai

sans leta hai
mere hathon ki rekhaon mein

jaane kaisi zanjiren paDin
roz-e-awwal se

main zanjir-e-ahan toD kar
roz-e-abad tak ja nahin sakti

main kaliyan chun nahin sakti
mere jazbon ke naKHlistan mein sabza sar uThata hai

hawa dhime saron mein gungunati hai
fazaen raqs karti hain

KHuda aawaz deta hai
main sar newDha ke sunti hun

dayar-e-ruh mein ek an-suna naghma machalta hai
main us naghme ko lab tak la nahin sakti

mere tapte badan par
sabz shaKHon ki phuwaren sukh jati hain

meri aankhon ki jhilon mein
munawwar la-jawrdi aasman ka aks hota hai

ufuq ke par ek khiDki si khulti hai
sawad-e-waqt ki sari tanaben TuT jati hain

magar yaKH-basta diwaren
mujhe har samt se yun gher leti hain

main parwaz-e-tamanna kar nahin sakti
meri aankhon ko nila aasman hasrat se takta hai

kai umren guzar aai
kai duniyaen chhan aai

kai sahraon mein naqsh-e-qadam chhoDe
kai dariya lahu ke par kar aai

kai aatish-kadon mein jazb-e-dil kundan bana aai
magar ab bhi meri zanjir-e-ahan khaDkhaDati hai

mujhe jab jab bhi nila aasman hasrat se takta hai
main apne aatish-e-dil se jala deti hun

us zanjir ki kaDiyan
sitaron tak pahunchti hun

madar-e-nur mein mahtab ki ham-raqs hoti hun