jeneral-sahib
rozana subh-sawere
ThanDe pani se nahate hain
aur tayyar hone lagte hain
wardi pahan kar
wo sidhe lawn mein jate hain
taza hawa aur khile hue phul
unhen bahut pasand hai
wo din bahut KHarab guzarta hai
jab sola jawan
chaar naeb sube-dar aur do kaptan
court-marshal ke
ahkaamat sunte hain
aur mali ki bhi
jaan-baKHshi nahin hoti
us din jeneral-sahib
ek kali ko apne jute ke niche
ye kah ke kuchal dete hain:
us mein koi KHushbu nahin
hamein baad mein malum hota hai
jeneral-sahib ki nak
ek arse band thi
Nazm
Jeneral-sahib ki nak
Zeeshan Sahil