na chheD ai dil jawani ki kahani
kisi ki dil-sitani ki kahani
wo soz-e-zindagi-afroz ka zikr
wo dard-e-jawedani ki kahani
wo dukh ki jagti raaton ka qissa
wo ashkon ki rawani ki kahani
bahaaren mastiyon ki dastanen
KHumarin sargirani ki kahani
masarrat-ashna gham ka fasana
gham-agin shadmani ki kahani
wo honTon se lage jamon ka qissa
wo aatish-mauj pani ki kahani
meri aaankhon mein aansu jhum aae
na chheD ai dil jawani ki kahani
Nazm
Jawani ki kahani
Majeed Amjad