Jawab-e-shikwa

aah jab dil se nikalti hai asar rakhti hai
gulshan-e-zist jalane ko sharar rakhti hai

top talwar na ye tegh-o-tabar rakhti hai
bint-e-hawwa ki tarah tir-e-nazar rakhti hai

itna pur-soz hua nala-e-saffak mera
kar gaya dil pe asar shikwa-e-bebak mera

ye kaha sun ke sasur ne ki kahin hai koi
sas chupke se ye bolin ki yahin hai koi

saliyan kahne lagin qurb-o-qarin hai koi
sale ye bole ki mardud-o-lain hai koi

kuchh jo samjha hai to ham-zulf ke behtar samjha
mujh ko begam ka sataya hua shauhar samjha

apne haalat pe tum ghaur zara kar lo agar
jald khul jaegi phir sari haqiqat tum par

main ne ugne na diya zehn mein nafrat ka shajar
tum pe Dali hai sada main ne mohabbat ki nazar

kah ke sartaj tumhein sar pe biThaya main ne
tum to beTe the faqat bap banaya main ne

main ne sasural mein har shaKHs ki izzat ki hai
sas sasure nahin nandon ki bhi KHidmat ki hai

jeTh dewar se jeThani se mohabbat ki hai
main ne din raat mashaqqat hi mashaqqat ki hai

phir bhi honTon pe koi shikwa gila kuchh bhi nahin
mere din raat ki mehnat ka sila kuchh bhi nahin

subh-dam bachchon ko tayyar karaati hun main
nashta sab ke liye roz banati hun main

basi tum khate nahin taza pakati hun main
chhoDne bachchon ko school bhi jati hun main

main ki insan hun insan nahin jin koi
meri taqdir mein chhuTTi ka nahin din koi

wo bhi din the ki dulhan ban ke main jab aai thi
sath mein jine ki marne ki qasam khai thi

pyar aaankhon mein tha aawaz mein shahnai thi
kabhi mahbub tumhaari yahi harjai thi

apne ghar ke liye ye hasti miTa di main ne
zindagi rah-e-mohabbat mein luTa di main ne

kis qadar tum pe giran ek faqat nari hai
dal roTi jise dena bhi tumhein bhaari hai

mujh se kab pyar hai aulad tumhein pyari hai
tum hi kah do yahi aain-e-wafadari hai

ghar to biwi se hai biwi jo nahin ghar bhi nahin
ye double bed ye takiya nahin chadar bhi nahin

main ne mana ki wo pahli si jawani na rahi
har shab-e-wasl nai koi kahani na rahi

qulzum-e-husn mein pahli si rawani na rahi
ab main pahle ki tarah raat ki rani na rahi

apni aulad ki KHatir main jawan hun ab bhi
jis ke qadmon mein hai jannat wahi man hun ab bhi

the jo ajdad tumhaare na tha un ka ye shiar
tum ho biwi se pareshan wo biwi pe nisar

tum kya karte ho har waqt ye jo tum bezar
tum ho guftar ke ghazi wo sarapa kirdar

apne ajdad ka tum ko to koi pas nahin
hum to behis hain magar tum bhi to hassas nahin

nahin jin mardon ko parwa-e-nasheman tum ho
achchhi lagti hai jise roz hi uljhan tum ho

ban gae apni grihasti ke jo dushman tum ho
ho ke ghairon pe fida biwi se bad-zan tum ho

phir se aabaad nai koi bhi wadi kar lo
kisi kalbisni se ab dusri shadi kar lo