Jalti raat sulagte sae

qatra qatra Tapak raha hai lahu
lamha lamha pighal rahi hai hayat

mere zanu pe rakh ke sar apna
ro rahi hai udas tanhai

kitna gahra hai dard ka rishta
kitna taza hai zaKHm-e-ruswai

hasraton ke darida daman mein
jaane kab se chhupae baiTha hun

dil ki mahrumiyon ka sarmaya
TuTe-phuTe sharab ke saghar

mom-batti ke adh-jale TukDe
kuchh tarashe shikasta nazmon ke

uljhi uljhi udas tahriren
gard-alud chand taswiren

mere kamre mein aur kuchh bhi nahin
mere kamre mein aur kuchh bhi nahin

waqt ka jhurriyon bhara chehra
kanpta hai meri nigahon mein

kho gai hai murad ki manzil
gham ki zulmat-farosh rahon mein

mere ghar ki purani diwaren
har ghaDi dekhti hain KHwab nae

par meri ruh ke KHarabe mein
kaun aaega itni raat gae

zindagi mehrban nahin to phir
maut kyun dard-ashna hogi

khaTkhaTaya hai kis ne darwaza
dekhna sar-phiri hawa hogi