Is se baDa dukh kya hoga

is se pahle
jitni iden guzri hain

har id se pahle
mere bachche

apni narm rupahli banhen
meri gardan mein jab Dal ke kahte the

hum eidi lene aae hain
wo KHushiyon se labrez munawwar ghaDiyan

kitni achchhi lagti thin jab
baDi baDi raqmon ko wo Thukraate the

aur baDe baDe tohfon par bhi wo
apne munh laTkate the

wo mujh se ruTh ke
apni ammi ke pahlu mein jate the

wo un ki chamkili chahat
wo un ke ruTh ke jaane ki

be-dard si hasrat
jab bhi karwaT leti hai

dil KHun ke aansu rota hai
aur ab ke hisar zindan mein

yun id hamari guzri hai
wo jhagDa karne wale

ruTh ke jaane wale bachche
mujh ko jail mein eidi dene aae hain