Is ahd ki be-his saaton ke nam

yahan ab ek tara
zard tara bhi nahin baqi

yahan ab aasman ke
chithaDon ki phaDphaDahaT bhi nahin baqi

yahan par sare suraj
tare suraj

tairte aflak se gir kar
kisi patal mein gum hain

yahan ab sare sayyaron ki gardish
ruk gai hai

yahan ab raushni hai
aur na aawazon ki larzish hai

na jismon mein hi harakat hai
yahan par ab faqat

ek KHamushi ki phaDphaDahaT hai