Ek rail ke safar ki taswir khinchta hun

isi mein millat-e-baiza sama 'ja kud ja bhar ja
teri qismat mein likkha ja chuka hai tisra darja

na gunjaish ko dekh is mein na tu mardum-shumari kar
langoTi kas KHuda ka nam le ghus ja sawari kar

wo khiDki se kisi ne morcha-bandon ko lalkara
phir apne sar ka gaThra dusron ke sar pe de mara

kasi ne dusri khiDki se jab dekha ye nazzara
zamin par aa raha dham se koi taj-e-sar-e-dara

agar ye railway ka silsila iran ja pahunche
to sikkhar par utarta shaKHs asfahan ja pahunche

ye sare khet ke ganne kaTa laya hai Dabbe mein
wo ghar ki chaarpai tak uTha laya hai Dabbe mein

khaDe huqqe ba-ma-minar--eatish-dan to dekho
ye qaum-e-be-e-sar-o-saman ka saman to dekho

wo ek rassi mein pura lao-lashkar bandh lae hain
ye bistar mein hazaron tir nashtar bandh lae hain

surahi se ghaDa roTi se dastar-KHwan laDta hai
musafir KHud nahin laDta magar saman laDta hai

wo ek dana-e-gul logon mein yun ghul-mil ke baiThe hain
razai mein jo yun baiThe hain goya sil ke baiThe hain

awamunnas ko dars-e-falah-e-am dete hain
bahr-su thukne ka farz bhi anjam dete hain

idhar kone mein jo ek majlis-e-bedar baiThi hai
kirae par election ke liye tayyar baiThi hai

siyasat mein dama-dam apna chamcha marte jaen
agarche haarte jaen magar lalkarte jaen

baDe launDe ko maula-baKHsh-ji kitna paDhaoge!
use B-A pe rokoge ki LLB karaoge!

wo B-A hai magar B-A ki KHu aai nahin us ko
abhi man bap ke kapDon se bu aai nahin us ko

baham yun guftugu mein aashnai hoti jati hai
laDai hoti jati hai safai hoti jati hai